الثلاثاء, سبتمبر 18, 2018

وآخيرا اخذت إجازة

  

سسسسسلام عليكممم

 

 

ي ربآآآه لي زمااان مااكتب شي في المدونة، والسبب آنشغالي بالدراسة. قوه كرف مو طبيعي !!

الحمدلله من أسبوع اخذت اجازة حوالي شهر تقريبا ونزلت السعودية بعد غيبة سنة كاملة عن آهلي وإحبابي 

مع أنه الرحلة كانت متعبة جدا ومشوار طوويل والسبب كان لاني حجرت متاخر مره لانه كان عندي      

 مشاكل في الفيزا وكانت السفرة بكبرها راح تتكنسل بس دعوات الوالدة الله لا يحرمني من دعواتها ولا

منها ي رب ، تساهلت الامور وآخذنا الاجازة انا والمدام ، عالاقل نغير شوي جو الدراسة المتعب والممل 🙁

بقولكم مسار رحلتي علشان تعرفو كرهي لكندا بسبب البعد الكبير بينها وبين السعودية 

انا ساكن في مدينة آسمها سانت جونز في يوم 9 ديسمبر الفجر بدت الرحلة بعد طيران مايقارب

الساعتين والنص وصلنا لمدينة مونتريال في كندا برضو وجلسنا انتظار 16 ساعة ، اتفقنا أنا وزوجتي نقضيها تسوق بالمدينة

ونروح كذة منطقة معروفة في مونتريال بس بصراحة لم جات 2 الظهر حسينا اننا غلطنا في هل المخطط 🙁 <- برد وتعب وقلة نوم.

والحمدلله تجملنا لين قبل موعد الرحلة بآربع ساعات قلنا نروح المطار وناخذ لنا كوفي هناك ونجلس

نسوالف ونتفرج باللي رايح واللي جاي ، وعدا الوقت مع السوالف والتعليق على ماشي واللي مدري

شنو لابس <- كلها علشان نضيع الوقت وبس. بعدها ماجاء ندا الرحلة ماصدقنا أنه خلصنا من هل

الانتظار الممل، وعالطول امسك طابور وادخل الطيارة لين وقت الأقلاع ،

IMG_1847

 

فأول مادخلنا قالو شوي ويجيكم العشاء ، قلنا يلا ننتظر كمان ساعة نتعشي وننام <-ورانا 12 ساعة في

الجو اذا مانمنا والله بشق هدومي من الطفش وخرمة السيجارة 🙂 ، آول ماخلصت عشاء شغلت لي فلم

ونووووم مو طبيعي ماصحيت الا باقي 3 ساعات ع الوصول للدوحة 🙂 <-لي يوم ونص مانمت قبلها .

والحمدلله وصلنا للدوحة وجلسنا فيها 7 ساعات ” الغريب في مطار الدوحة ماشفت قطري شغال

بالمطار الا في منطقة التفتيش بس والباقي كله آجانب !! بصراحة استغربت بذي الشي وحست اني مو

بدولة خليجية وقتها ” وعدت ال7 ساعات وعلى جدة ي معلمممم  وكان وقت وصولنا في مطار جدة

الدولي ( الزبالة) اللي والله حرام اسمو مطار دولي ونستقبل في الناس من كل أنحاء العالم !.

واخيرا والحمدلله دخلنا الاراضي السعودية الساعة 3 ونص يوم 11 ديسمبر وأنا حاليا بالمدينة مع آهلي

واقاربي وروقان ولا دوام ولا مذاكرة ولا قروشة 🙂

 

 

شاهد أيضاً

يومياتي | Diaries

يومياتي | Diaries   السسسلام عليكم   قررت افتح هذة القسم علشان اتكلم عن تجاربي …

أترك لك رد هنا ... بصمه ب ( شكر/ حكمة / نصيحة ) ..